Galicia terá unha estratexia pioneira en España para reducir a exposición da cidadanía ao gas radón

O Consello da Xunta deulle o visto bo ao informe sobre a Estratexia galega reduce radón, iniciativa pioneira a nivel nacional da Consellería de Sanidade, impulsada co obxectivo de desenvolvela no período temporal 2025-2030 para reducir o nivel de exposición da cidadanía a este gas.

O gas radón é especialmente abundante en Galicia debido, entre outras cousas, ao alto contido en granito do subsolo. A súa concentración en ambientes interiores depende da área xeográfica e do nivel de illamento das construcións. A exposición continuada a niveis elevados de radón no interior das vivendas é o segundo factor de risco despois do tabaco para padecer cancro de pulmón e o primeiro, no caso de persoas que nunca fumaron.

Obxectivos da Estratexia

A Estratexia galega reduce radón con dous obxectivos principais: reducir os niveis deste gas en ambientes interiores para manter os límites de exposición de acordo coa normativa europea e española; e previr e controlar as consecuencias para a poboación galega da exposición ao radón en ambientes interiores. A estratexia presentarase nun acto público o vindeiro 7 de novembro coincidindo co Día europeo do radón.

A Estratexia galega reduce radón estrutúrase en cinco eixes estratéxicos para acadar unha Galicia menos exposta a niveis de radón nos ambientes interiores.

1. Identificar os niveis de radón en lugares e áreas de Galicia, de modo que se poidan saber as áreas nas que existe unha maior probabilidade de encontrar altas concentracións de radón en edificacións, para facilitar o deseño da protección a nivel colectivo. Durante a vixencia do plan, a Xunta medirá os niveis do radón en centros sanitarios, educativos, sociosanitarios e fomentará a medición nos fogares e centros de traballo privados.
2. Vixilancia epidemiolóxica e da saúde, que servirá para orientar con maior eficacia a prevención dos riscos para a saúde asociados á exposición a niveis de radón, así como realizar a planificación e avaliación sanitaria. Con este obxectivo, implantarase un sistema sinxelo de recollida de información sobre exposición ao radón para que sexa incorporada á carpeta persoal e á historia clínica electrónica única de cada paciente da sanidade pública galega.
3. Acadar unha boa xestión do coñecemento dos efectos da exposición ao radón na saúde da poboación para conseguir a integración dos diversos sectores involucrados con vistas a obter solucións integrais e que estas sexan as mellores solucións posibles. Neste sentido, a Xunta impulsará a investigación interdisciplinar de excelencia entre a saúde pública e outras áreas de coñecemento, en colaboración coas universidades galegas. Ademais, desenvolverase un plan de formación de axentes que interveñen no ámbito da edificación, do arrendamento ou da prevención de riscos laborais.
4. Acadar unha comunicación eficaz e clara para os profesionais e a poboación para conseguir o apoderamento para a saúde das persoas a título individual e das comunidades. Na práctica, deseñarase un plan de comunicación e información sobre os riscos para a saúde da exposición ao radon, así como a elaboración de guías para reducir a exposición aos niveis de radon nos edificios existentes.
5. Xestión do risco da exposición ao radón na poboación galega. Crearase unha comisión interdepartamental, adscrita á Dirección Xeral de Saúde Pública, para coordinar e impulsar as políticas públicas en relación ao gas radón. Tamén está previsto crear a Oficina técnica de control do radón para, poñer en marcha e desenvolver todas as accións indicadas nesta estratexia.