De Lara apraza por vez segunda a declaración de López Orozco no caso Garañón

A titular do Xulgado de Instrución Número 1 de Lugo, Pilar de Lara, aprazou por segunda vez a declaración que ía prestar o exalcalde da cidade, o socialista José López Orozco, na causa do chamado caso Garañón, no que tamén está imputado o secretario xeral dos socialistas galegos, José Ramón Gómez Besteiro.

López Orozco fora citado inicialmente para prestar declaración o pasado 31 de xullo, no seu caso por tráfico de influencias, prevaricación e un delito contra a ordenación do territorio.

Con todo, esa declaración foi aprazada, do mesmo xeito que a de Gómez Besteiro, que fora citado para ese mesmo día, no seu caso imputado por tráfico de influencias, prevaricación, suborno e delito contra a ordenación do territorio.

Posteriormente, despois de escoitar as declaracións do promotor das torres de O Garañón, Ricardo Iglesias, e do avogado que se ocupou da redacción do convenio urbanístico, a instrutora volveu citar a López Orozco para o día 26 de outubro, pero como imputado só por un delito contra a ordenación do territorio.

Segundo informou o Tribunal Superior de Xustiza de Galicia (TSXG), esa declaración foi aprazada ao día 18 de novembro.