Obituario | Morre Bernardino Graña, poeta e escritor galego, aos 92 años

O poeta Bernardino Graña morreu aos 92 anos. O escritor e catedrático deixa un gran legado na lingua e na literatura galega, sendo un recoñecido defensor da identidade de Galicia, tanto a través da súa obra como no seu compromiso cultural.

Desde moi novo, incorporouse ao Consello de Redacción da revista poética Alba, unha plataforma fundamental para a poesía galega da época. Como articulista, colaborou activamente en xornais como La Noche e Faro de Vigo, e deixou tamén a súa pegada como ensaísta en diversas publicacións.

A súa obra ocupa un amplo espectro de xéneros. Na poesía, Graña ofreceu obras como Profecía do mar , Non vexo Vigo nin Cangas e Se o noso amor e os peixes…, títulos nos que explorou a beleza, a identidade e o vínculo coa natureza e o mar, un dos seus selos de identidade.

Con todo, foi na literatura infantil e xuvenil onde Bernardino Graña concentrou boa parte das súas obras. A súa produción neste ámbito supera os vinte títulos, entre os que destacan clásicos como O león e o paxaro rebelde, O gaiteiro e o Rato Pérez ou Contra o león covarde. Membro da Real Academia Galega, Graña foi recoñecido con numerosos galardóns ao longo da súa carreira.

O legado de Bernardino Graña transcende aos libros que deixou, xa que estará sempre presente no impulso á identidade galega e na promoción da lingua.