Podcast UVigo | Formación sobre divulgación científica con Lucía Calvo e Iago Pozo

A Unidade de Cultura Científica e da Innovación (UCC+i) da Universidade de Vigo inaugura cunha formación sobre divulgación científica para persoal investigador, o seu plan de actividades para este curso académico. O programa Ciencia de Ida e volta, que chega a súa cuarta edición, espallará actividades de divulgación científica polos tres campus (Vigo, Ourense e Pontevedra) co obxectivo de implicar á cidadanía no traballo dos grupos de investigación da institución e visibilizar como as distintas liñas científicas tratan de responder ás necesidades da sociedade. En total, o Plan anual de actividades da UCC+i, comprende arredor dunha vintena de propostas ata o vindeiro mes de xullo e conta cun orzamento de 99.649 euros, dos cales 40.000 son achegados pola Fundación Española para la Ciencia y la Tecnología (FECYT) del Ministerio de Ciencia, Innovación y Universidades.

Un dos principais propósitos do proxecto Ciencia de Ida e Volta é, precisamente, potenciar as capacidades do persoal investigador para comunicar o seu traballo e trasladar á sociedade os avances científicos. Para avanzar neste camiño, a vindeira semana (21 e 22 de outubro) impartirase o obradoiro 'Comunica a túa ciencia', un taller destinado a investigadores e investigadoras da UVigo no que coñecerán a importancia da divulgación e as principais ferramentas para comunicar ciencia.

Hoxe acompáñannos no podcast Ciencia de Ida e Volta Lucía Calvo, técnica de comunicación do CINBIO; e Iago Pozo, director da Área de Promoción da Internacionalización da UVigo. Con unha ampla experiencia en proxectos de divulgación, con eles falaremos da importancia de comunicar a ciencia, así como deste curso que vai ter lugar os días 21 e 22 de outubro no edificio Redeiras, en Vigo. Benvidos ao podcast.