PP e BNG, xuntos nunha moción de censura para botar ao alcalde de Muxía

“Os últimos 16 meses, nos que o actual alcalde se negou continuamente a dialogar coa oposición, caracterizáronse pola ausencia de orzamentos actualizados; abuso na utilización e esgotamento do remanente; extralimitacións na contratación menor; pago de facturas e contratación sen partidas orzamentaria asignadas; incumprimento de acordos plenarios; xestión ineficiente dos servizos municipais; contratos vencidos sin renovar; incapacidade para o diálogo político; ataques de carácter persoal e menosprezo ao labor da oposición; ademáis de que o SAF permanece sen licitar”, expón o comunicado dos tres grupos da oposición en Muxía (PP, Independentes e BNG) para xustificar a moción de censura que rexistraron este luns contra o actual alcalde, Iago Toba (PSdeG-PSOE).

O PSOE da Coruña respondeu de inmediato contra o que considera “un atropelo democrático”. “Muxía ten un alcalde socialista, Iago Toba, que obtivo nas municipais do 2023 case o dobre de votos que a segunda forza no concello, o PP”, lembran os socialistas. Os socialistas foron a primeira forza política nas eleccións municipais de 2023, nas que obtiveron cinco concelleiros, fronte aos tres do PP, dous dos independentes e un do BNG.

“Pese a que a líder do BNG, Ana Pontón, negou o pasado mes de maio contactos co Partido Popular para artellar unha moción de censura en Muxía, o certo é que esta vén de ser rexistrada coas sinaturas dos concelleiros de PP, BNG e Independentes”, continúa o escrito.

O BNG desautorizou a moción de censura e a súa única concelleira no municipio, Mercé Barrientos, foi proposta para a apertura dun expediente que deberá ser resolto polo Consello Comarcal. A decisión foi adoptada pola Executiva Nacional. Advertiron que non avalarán “ningunha” moción de censura que implique a participación do PP.

O tres partidos da oposición propuxeron como candidato á Alcaldía ao portavoz de Independentes por Muxía, o expatrón maior da confraría de pescadores, Francisco Javier Sar. O pleno para votar a moción e investir ao novo alcalde celebrarase o próximo 7 de outubro ás 12,00 horas. O socialista Iago Toba leva gobernando en Muxía cinco anos pero, desde os comicios locais de 2023 maio en minoría. Após esas eleccións, nas que o PSdeG baixou de 7 a 5 representantes, Toba foi investido cos únicos votos do seu grupo, mentres que os grupos da oposición non alcanzaron un acordo para conformar unha maioría alternativa.

A portavoz do BNG, Mercé Barrientos, recalcou que o que se dá en Muxía é “unha situación de excepcionalidade democrática”, e insistiu en que o BNG “nunca” dará unha Alcaldía ao PP, do que lle diferencia “unha ideoloxía diametralmente oposta”.

Francisco Javier Sar destacou que a oposición primou a súa responsabilidade cara aos veciños, deixando de lado “intereses partidistas” no mandato de Iago Toba.