Rueda reivindica o liderado tecnolóxico que atrae talento

O presidente da Xunta, Alfonso Rueda, reivindicou no Porriño o liderado tecnolóxico de Galicia como un factor clave para atraer e reter talento cualificado e reforzar a competitividade do tecido produtivo. Fíxoo durante a inauguración do novo Centro de Fabricación Intelixente e Sostible de Aimen.

Durante a súa intervención, Rueda destacou que este novo centro representa un paso máis na aposta de Galicia pola innovación e a transferencia de coñecemento cara ao tecido empresarial. Ao seu xuízo, infraestruturas de vangarda como esta permiten que sectores estratéxicos da economía galega, como a automoción, o naval, a aeronáutica ou a enerxía, dispoñan das solucións tecnolóxicas necesarias para mellorar a súa competitividade, incrementar a súa eficiencia e impulsar a innovación.

“Estamos na vangarda da innovación tecnolóxica”, asegurou o presidente, quen tamén puxo en valor a capacidade de Aimen para atraer talento internacional. Neste sentido, destacou que o centro conta con profesionais de ata 19 nacionalidades, un feito que, segundo afirmou, evidencia a capacidade da entidade para captar e reter persoal altamente cualificado grazas á excelencia do seu traballo.

O titular do Executivo galego incidiu, ademais, na importancia da colaboración público-privada como ferramenta imprescindible para achegar a investigación, o desenvolvemento e a innovación ao día a día das empresas e da industria. Segundo explicou, esta cooperación permite que os avances científicos e o coñecemento xerado nos centros de investigación se convertan en aplicacións prácticas e en melloras tanxibles que repercutan directamente na competitividade das empresas e no benestar da sociedade.

A Xunta destina 3,2 millóns de euros á posta en marcha deste novo Centro de Fabricación Intelixente e Sostible, unha achega que representa o 50 % do investimento total do proxecto. A iniciativa está cofinanciada con fondos europeos do programa Feder 2021-2027 e enmárcase na estratexia para consolidar unha rede de centros tecnolóxicos capaz de situar a comunidade como un referente en innovación nas próximas décadas.

Neste contexto, salientou a fortaleza da rede de centros tecnolóxicose lembrou o esforzo investidor realizado pola Xunta. Desde o ano 2009, o Executivo autonómico destinou 225 millóns ao seu desenvolvemento, co obxectivo de favorecer a transferencia de coñecemento, impulsar a innovación empresarial e facilitar a incorporación das novas tecnoloxías ao tecido produtivo.