A Xunta tramita 6.000 bolsas máis para libros e destina seis millóns a material escolar

En termos porcentuais, as previsións da Consellería son ter que afrontar un incremento do 5% nos pagos en becas para libros. De feito, Galicia é a comunidade autónoma que está á cabeza en axudas para compra de libros de texto, cun investimento de máis de 20 millóns de euros, o maior en función da súa poboación escolar. Ademais, a Xunta está no grupo de cabeza en canto ás contías individuais das axudas, con bolsas, un ano máis, de ata 250 euros. Feitos como este poñen de manifesto o esforzo que o departamento educativo da Xunta de Galicia está a realizar para garantir o acceso da cidadanía aos servizos educativos básicos, con máis axudas a quen máis o necesita.

No que atinxe ao profesorado, cómpre sinalar que a ratio de alumnos por profesor en Galicia é a segunda máis baixa do Estado, con 10,4 alumnos por profesor e a que menos se ten incrementado nos últimos cursos, habida conta de que no Principado dita taxa subiu seis décimas e en Galicia catro.

Ademais, respecto da ratio máxima de alumnos por aula, esta non se incrementou en Galicia, como si ocorreu en moitas comunidades autónomas. Polo tanto, é debido á xestión responsable e eficaz da Consellería, pódese dicir que o ensino en Galicia afrontou o escenario de axustes que se aplicou en todo o Estado desde unha posición máis vantaxosa, grazas ás medidas tomadas antes pola Xunta.