Fendetestas, o novo rock ourensán

Fendetestas é o grupo ourensán promesa para brillar nos festivais de verán de Galicia, con disco en plena gravación baixo un estilo rock “pero con moitos matices”, precisa Alejandro Nogueira “Jimmy”, baixo e coros do grupo que completan Xacobe Rosselló “Jaco” en guitarra e voz e Rubén Gil “Mice” en batería e coros. O grupo creado no Barco de Valdeorras no outono de 2023 conta para o seu inminente traballo con cancións “cunha base rítmica compacta e unhas guitarras e voces contundentes na mellor das tradicións rockeiras, pero con detalles doutros estilos coma o reggae ou o punk” e “letras bastante irreverentes e contestatarias pero sempre cun punto de sarcasmo, sobre como está o mundo e a sociedade, aínda que tamén hai algunhas cancións que abordan temas máis festivos e costumistas”, explica o músico oriúndo de O Carballiño que conta entre os seus antecedentes musicais grupos como The Generados, Atlantida, Kalma, La Banda Desarmada o Kambotes.

Ensaian na Asociación de Música Alternativa de Valdeorras (AMAVA), nun local cedido polo Concello de O Barco de Valdeorras. Como funciona?

Pois si, entre outras cousas a través da asociación xestiónase a colaboración con outras asociacións e colectivos sociais e culturais para a realización de concertos e outras actividades. Tamén dende AMAVA mantense un contacto constante co Concello de O Barco de Valdeorras e sen o cal sería moi difícil que a asociación funcionara, xa que nos ceden gratuítamente o local de ensaio e sufragan os gastos do mesmo, ademais de contar con nós para moitas das actividades que organizan. A verdade é que sen esta asociación seríanos imposible levar a cabo a nosa actividade.

Hai pouco máis dun ano que se formou o grupo, máis aló de que no teu caso en particular tes moita experiencia na música. Como é emprender un proxecto musical en Ourense?

É moi complicado, nunca foi doado pero nestes tempos é case un exercicio de fe. Hoxe apenas existen salas ou locais onde poder tocar e a industria musical tanto na provincia como no resto da comunidade vai enfocada cara outros estilos e outras formas de entretemento máis masivos que o rock. O apoio institucional vai polo mesmo camiño e é practicamente nulo para os grupos pequenos, o que fai que moitas bandas abandonen ao pouco de nacer. O Barco é unha excepción, agora mesmo hai un montón de grupos e sobre todo de xente nova, o que demostra que co traballo asociativo e co apoio das administracións públicas conséguese que todo isto funcione ben.