Profesores, nenos e familias, unidos na reforma da biblioteca do colexio de Laza

FOMENTO DA LECTURA

O CEIP O Castiñeiro de Laza reinaugurou este martes a súa renovada biblioteca, “O raposo Fachón”, un espazo que forma persoas a través da lectura e que implicou a toda a comunidade educativa

Os representantes da Xunta, convidados de excepción da representación teatral protagonizada polos cativos e por tres pais. | C.L.M.

Entrar na biblioteca do colexio de Laza nada ten que ver coa imaxe mental que temos dunha de costume. Unha máxima preside a sala: “Ler é soñar cos ollos abertos”. E algo de certo debe haber niso, porque este amplo espazo, froito de unir dúas habitacións enormes, esperta os sentidos e abre a porta á curiosidade, tanto de pequenos como de maiores.

Coma se dunha cafetería-libraría se tratara, nesta “biblio” hai moito máis que aburridos estantes cheos de libros dos que apenas se adiviña o seu lombo. Aquí as obras chaman a atención e convidan a ser collidas polo lector. Tamén hai cadeiras reclinables, un sofá e mesas altas. Tódalas comodidades a prol da lectura para os 34 alumnos deste centro do rural.

Na segunda estancia aínda hai máis libros, pero tamén xogos de mesa, impresión 3D, kits de invencións, un tipi e ata unha bancada móbil para xuntarse arredor do proxector.

En definitiva, aquí a biblioteca é “o corazón da escola”, tal e como a definiu Carolina Palomanes, a súa coordinadora, unha figura clave para entender a recente transformación deste espazo que busca que a cativada “soñe, investigue, descubra novos mundos, e ademais aprenda a mirar a realidade con ollos críticos”.

Aspecto que presenta a renovada primeira estancia da biblioteca do centro. | C.L.M.

Esforzo colectivo

No seu discurso este martes, con motivo da reinauguración trala reforma acometida grazas ao Plan de Mellora de Bibliotecas Escolares da Xunta (Plambe), Palomanes agradeceu o tempo, esforzo e dedicación das familias do alumnado, que se implicaron xunto cos equipos docentes pasados e presentes para facer realidade un proxecto “buscado durante catro anos”.

A historia recente da biblioteca d’O Castiñeiro remóntase ao 2008, cando Juanlu Rivero asumiu a dirección e fixou un novo “rumbo” para este recurso. Daquela xa se solicitara o Plambe, pero unha inundación en 2012 danou moito do material. Nos seguintes anos, o cambio constante de docentes tivo un impacto na biblioteca.

Pero co regreso en 2021 de Juanlu como director e a chegada de Palomanes, todo mudou. Ademais de comprarse mobles e libros apareceu Fachón, o raposo de peluche que dá nome á biblioteca.

As melloras foron continuas e creouse unha radio no espazo. O ano pasado obtiveron de novo o Plambe, dotado con 4.000 euros, e a través del produciuse esta última gran transformación, na que proxenitores, estudantes e profesores colocaron tarima, montaron mobles e deron forma á biblioteca actual.

A cativada de Laza guiou os representantes da Xunta pola biblioteca renovada. | C.L.M.

Teatro familiar

Judith Fernández, directora xeral de Ordenación e Innovación Educativa, acudiu este martes ao colexio xunto con Jorge Sampedro, xefe territorial da Consellería de Cultura; Roberto Cid, inspector educativo, e Loli Nieto, asesora de bibliotecas escolares.

Os rapaces guiaron os representantes polo novo espazo, nun acto ilusionante para o profesorado, e que rematou cunha interpretación teatral do conto portugués “Corre corre, cabaciña”, protagonizada por pais e cativos.

Os adultos con fillos escolarizados aproveitaron a ocasión para pedir que colexios do rural como O Castiñeiro “se manteñan o máximo posible, porque somos uns privilexiados por ter centros coma este”. E con bibliotecas así, conviría engadir, que fan posible un dos obxectivos que reza un dos seus carteis: “Un neno que le, será un adulto que pensa”.