Tractoradas e batas, premios por financiar o festival Ponte Farruca de Laza

O Ponte Farruca, unha romaría contemporánea que organiza en Laza a asociación cultural enLAZAdos, segue medrando ano tras ano. A cuarta edición desta iniciativa cultural, que busca promover a diversidade sexual, a igualdade de xénero e a visibilidade do colectivo LGTBI+ no interior do país, ao tempo que reivindica a identidade e a cultura do rural, terá lugar por primeira vez ao longo de tres días (os vindeiros 15, 16 e 17 de agosto).

Na súa curta traxectoria ata o de agora, o Ponte Farruca converteu os desfiles en tractor e a bata tradicional galega en dous dos seus símbolos máis recoñecibles, ata o punto que recentemente agasallaron unha bata personalizada a Melody, a última representante estatal en Eurovisión.

Co fin de poder financiar parte das actividades destacadas que teñen lugar cada edición, como unha feira de artesanía e material agrícola, a súa recoñecida “tractorada engalanada”, a sesión vermú, os concertos, ou os obradoiros, dende a organización veñen de lanzar un crowdfunding ou micromecenado.

Grazas a el, tódolos interesados en colaborar coa celebración do festival poden facer achegas a partir dos 10 euros, e obter a cambio diversas recompensas no propio Ponte Farruca, un festival que por outra banda é totalmente gratuíto.

Este crowdfunding está xa dispoñible na plataforma goteo.org e durará un total de 80 días, en dúas rondas. O obxectivo mínimo é de 2.000 euros, pero dende enLAZAdos esperan poder acadar “3.150 ou máis, toda axuda é benvida”. Os organizadores lembran ademais que entre “un 35% e un 80%” do importe das achegas “pódese desgravar na declaración da Renda”.

Programación

Ao longo das próximas semanas irase desvelando o cartaz completo do Ponte Farruca e a súa distribución por días. En todo caso, espérase que volva haber actividades de educación en igualdade de xénero para a cativada, así como o regreso do “Farruca Dates”, unha forma diferente de coñecer xente nun ambiente distendido.