A Raia celebra os seus lazos compartidos na III Festa da Respiga de Lobios

DESFILE DE ENTROIDOS

A asociación cultural Os Follateiros celebrou en Lobios unha nova Festa da Respiga que puxo en valor os lazos comúns arraianos entre vilas fronteirizas de Galicia e Portugal

A Praza Roxa encheuse de demostracións e actividades | A.C. Os Follateiros

Lobios viviu este domingo unha gran celebración arraiana coa III Festa Etnográfica da Respiga, unha xornada organizada pola asociación cultural Os Follateiros que uniu tradición, música, gastronomía e amizade entre vilas galegas e lusas fronteirizas.

O día comezou ás 11,00 horas coa apertura da feira de artesanía e o animado desfile de entroidos, no que que os convidados Farrangalheiros de Castro Laboreiro e os Cabreiros de Muíños uníronse aos Follateiros anfitrións. Un percorrido cheo de cor e música pola rúa principal, da residencia ata a Praza Roxa.

Unha das probas do III Concurso Internacional da Respiga. | A.C. Os Follateiros

Á mañá tamén tivo lugar o III Concurso Internacional da Respiga, con probas singulares como “facer un canastro”, “debullar oito espigas” ou “respigar ata conseguir 30 espigas”, nas que os participantes amosaron as súas habilidades.

A festa completouse con mostras de cestería ou de como facer a rastra de millo, gastronomía galaico-americana e as actuacións do Rancho Folklórico de Castro Laboreiro, Os Afinantes e Os Rampeiros