Alumnos de Maceda mesturan aprendizaxe e servizos sociais

O alumnado de 1º Grao de Sistemas Microinformáticos e Redes do IES San Mamede de Maceda vén de rematar unha experiencia de aprendizaxe na que puxeron a punto e optimizaron os equipos informáticos da Escola Municipal de Música.

Esta iniciativa nace da Fundación Ayuda en Acción, a través do seu programa Impulsa que desenvolveu en Maceda mediante a iniciativa “Reinicia Maceda”, unha proposta de Apredizaxe-Servizo (ApS) en colaboración co Concello para que os alumnos puidesen realizar unha aprendizaxe práctica, ó tempo que melloraban os servizos públicos.

Andrés Felipe Tovar e Saúl Gálvez son dous destes alumnos que realizaron un mantemento preventivo dos equipos, e comentaron que a experiencia resultou “muy importante para acceder al mercado laboral”. Ademais, explicaron que “hacer este tipo de actividades fomenta nuestra creatividad y mejora nuestra dinámica de grupo de cara al futuro”. Están moi satisfeitos ca iniciativa: “Aprendemos. al tiempo que ayudamos”.

Vanessa Fernández, técnica orientadora de Ayuda en Acción, aclarou que “estamos moi contentos co resultado e é unha boa iniciativa que levar a outros centros”. Miguel Pan e Lucas Fernández, os profesores, incidiron en que “é unha boa entrada ó mundo laboral”.

Uxía Oviedo, alcaldesa de Maceda, explicou que “gústanos moito que conten co Concello para iniciativas coma esta”, e remarca a importancia de “que a xente nova se sinta amparada”.