Os veciños de Maceda elixiron a súa mellor tapa

O bar A Tapa recibiu hoxe o diploma de recoñecemento pola mellor tapa do VI Concurso de Tapas de Maceda, organizado pola Asociación de Comerciantes e Empresarios de Maceda e o Concello, no que participaron dez establecementos distintos.

Os locales participantes ofreceron a súa proposta dende o 16 ata o 20 de abril, e a “Focaccia a Toscana” foi a tapa elexida polos macedaos como a mellor entre todas as candidatas.

A entrega do diploma fíxose no propio bar, e no acto participaron Uxía Oviedo, alcaldesa do Concello; Maryuri Karina Hernández, secretaria da Asociación de Empresarios e Comerciantes de Maceda; xunto con Victor e Madalina, representantes do local.

Entre os veciños que emitiron o seu voto para elexir a mellor tapa tamén se entregaron agasallos, que incluían unha cea para dúas persoas, unha sesión de spa para dúas persoas e un bono para lectura de cincuenta euros. Entregáronse o martes pola mañá.