A Coral Albricias celebra 38 anos tradición vocal

Como cada ano, o 25 de decembro a Igrexa de Nosa Señora das Neves de Maceda acollerá o tradicional concerto de nadal da Coral Albricias, no que tamén participa a agrupación musical Os do Fuelle, dúas entidades estreitamente ligadas polos seus membros.

Este ano a coral celebra 38 anos dende que ofreceron o seu primeiro concerto, daquelas coma un grupo parroquial, no nadal de 1987. A raíz desta cita xurdiu o que hoxe é un dos baluartes musicais macedaos, que recibe o seu nome da primeira panxoliña que prepararon: Dadme albricias.

“Hoxe máis da metade xa non están con nós”, aclarou Juan “Tito” González, director da coral -e de Os do Fuelle-, “no seu momento fixeron unha gran labor pola coral”, na que Tito leva dende os comezos xunto a Raquel, a outra membro fundador que hoxe aínda participa. Tito quixo destacar a figura de Crisanto Fernández pola súa labor pola coral, ademais do seu traballo como párroco.

Simbiose

A relación entre as agrupacións dáse a que comparten membros, amantes confesos da música, polo que mañá os asistentes poderán desfrutar dunha cita -que comezará ás 19,00 horas- que mestura dous repertorios únicos pero interpretados -case- polos mesmos músicos.