Maceda agasalla aos clientes con descontos

A Asociación de Comerciantes e Empresarios de Maceda inaugurou onte a súa campaña “Maceda Rasca e Gaña: O teu comercio ten premio!”, que se estenderá ata o vindeiro 30 de outubro para promover a actividade comercial na vila.

Esta iniciativa presentouse o pasado martes no salón de plenos do Concello macedao, un acto ó que asistiron o presidente do Inorde, Rosendo Fernández; Uxía Oviedo, alcaldesa de Maceda; Beatriz Gómez, presidenta da Federación de Comercio de Ourense; xunto co presidente da asociación e a tesoureira, Roberto Carlos Freire e Lucía Apolinar.

Durante o acto presentouse o vídeo publicitario da campaña, que foi gravado integramente nos establecementos do comercio local macedao e pola produtora Faiado Producións, tamén de orixe macedá.

A campaña repartirá 5.000 euros en premios a través de boletos de formato rasca e gaña para as persoas que merquen nos establecementos da asociación por compras superiores a 20 euros. Os premios constan de descontos de cinco, 10 e 20 euros que os clientes poderán empregar na seguinte compra, que deberá ser como mínimo por valor do importe premiado.

Esta iniciativa pretende servir de enganche entre o período estival e o Nadal, como destacaron varios dos comerciantes, e conta cun financiamento do 80% do Inorde e coa colaboración do Concello de Maceda.

A campaña comercial alaricana rematou onte

O Concello de Allariz tamén celebrou durante este mes a novena edición do programa Merca no teu comercio, unha iniciativa impulsada pola Xunta en colaboración coa Federación Galega de Comercio. A campaña alaricana deu comezo a primeiros de mes e rematou onte, sendo o vindeiro 22 de outubro cando se entregarán as vinte tarxetas de 50 euros para gastar no comercio de Allariz ata o 31 de decembro.

A campaña presentouse o pasado 3 de outubro nun acto que contou coa participación do conselleiro de Emprego, Comercio e Emigración, José González, quen estivo acompañado polo director xeral de Comercio e Consumo, Gabriel Alén; o delegado territorial da Xunta en Ourense, Manuel Pardo; a presidenta da Federación de Comercio de Ourense, Beatriz Gómez, e a alcaldesa de Allariz, Cristina Cid.

O programa Merca no teu comercio busca fortalecer un sector comercial moderno, competitivo e preparado, ao tempo que se recoñece o seu peso como xerador de emprego e riqueza e como elemento clave para a vertebración do territorio.