Novo intento de aprobar os orzamentos en Maceda

Esta semana os dous grupos da coalición volveron reunirse polo tema dos orzamentos, e “todo apunta a un acordo”, indican dende o PSdeG-PSOE, confiando en que “pronto teremos orzamento para o 2025 no Concello de Maceda, sendo prioritaria a súa aprobación”.

A pre-estrea da curta na casa do Concello de Maceda.

O PSdeG-PSOE de Maceda vén de anunciar un novo acordo para a aprobación dos orzamentos para o 2025 co Bloque Nacionalista Galego, logo de que o anterior acordo, que en teoría debía aprobar os orzamentos no último pleno, na práctica, rompese por unha petición de retirada deste, “baseándose no Plan Xeral de Ordenamento Municipal (PXOM) e nos aparcadoiros, dous temas que como saben perfectamente, están en marcha”, apuntan os socialistas.

Dende o PSdeG-PSOE inciden en que esta decisión é unha “irresponsabilidade política e de deslealdade ao Goberno de Coalición” xa que sen a aprobación dos orzamentos, o Concello non podería facer fronte ós pagos a provedores, de asegurar o pago aos traballadores municipais e ós créditos concedidos ó Concello en 2022, 2023 e 2024.

Esta semana os dous grupos da coalición volveron reunirse polo tema dos orzamentos, e “todo apunta a un acordo”, indican dende o PSdeG-PSOE, confiando en que “pronto teremos orzamento para o 2025 no Concello de Maceda, sendo prioritaria a súa aprobación”. Uxía Oviedo, alcaldesa de Maceda, confía en que “o pleno será o antes posible”, indicando este venres como posible data de celebración.

Os socialistas esperan que con este acordo “volva a estabilidade” ó Concello de Maceda.