Dous xigantes e unha irmandade senlleira

O Concello de Manzaneda foi protagonista esta pasada fin de semana dun acto cargado de simbolismo e identidade galega: a creación dunha irmandade entre dúas árbores senlleiras do país, o centenario Carballo de Padroso, no municipio de Xunqueira de Ambía, e o Castiñeiro de Pumbariños, en Manzaneda.

A iniciativa, promovida pola Fundación Bieito Ledo, busca reforzar a conexión entre o patrimonio natural e a dinamización sociocultural do medio rural galego.

Durante a celebración da Terceira Homenaxe ao Carballo de Padroso, a Fundación fixo entrega ao Concello de Manzaneda dun fillo deste carballo milenario, un xesto que simboliza a unión entre ambos territorios. “É toda unha honra que nos escolleran xunto a institucións como a Fundación Rosalía de Castro, a Fundación Otero Pedrayo, a Casa Museo Curros Enríquez ou a Fundación Insua dos Poetas”, sinalan desde o Concello de Manzaneda.

O Carballo de Padroso, situado nun tramo do Camiño de Santiago, é un exemplar senlleiro coñecido polas súas grandes dimensións e pola enerxía que transmite a centos de peregrinos que o cruzan a diario. Ao seu carón celebrouse a homenaxe, onde se deu lectura á acta da Xunta Directiva da Fundación Bieito Ledo, e presentouse o III Libro do Carballo de Padroso, prologado por Manuel Bragado Rodríguez. A obra recolle textos de diversos autores e autoras, entre eles o artigo “O paporrubio e a irmandade entre o Castiñeiro de Pumbariños e o Carballo de Padroso” de Enrique González López, técnico municipal e enxeñeiro agrícola, quen a través dunha lenda dun intrépido paporrubio traza o vencello entre estas dúas árbores singulares.

No acto tamén se anunciou a intención da Fundación Bieito Ledo de transformar a casa natal do editor Bieito Ledo nun albergue para peregrinos, promovendo esta iniciativa a través da Lei do Mecenado.

O castiñeiro de Pumbariños, pola súa parte, agarda a sinatura oficial da irmandade, pendente da autorización do Servizo de Patrimonio Natural da Xunta de Galicia.

Desde Manzaneda xa adiantan a súa vontade de colaborar activamente na continuidade de actividades conxuntas: “Traballaremos cóbado con cóbado para que esta irmandade se materialice en accións culturais compartidas”, afirman desde o goberno local.

Este irmandamento representa para estes espazos naturais tal e como sinalan unha nova aposta pola defensa da identidade e do medio natural galego, recoñecendo os soutos e carballeiras como espazos vivos de cultura e memoria colectiva.