Manzaneda restaurará o curro pastoril da Mosenda

O Concello de Manzaneda asinou un convenio coa Axencia Galega de Desenvolvemento Rural para a adecuación do curro de pastores da Mosenda, unha actuación clave para a conservación do sistema tradicional de silvopastoreo na serra. O proxecto, cun investimento de 42.011,26 euros, permitirá mellorar a integración ambiental e optimizar as condicións para o manexo do gando.

Manzaneda conserva aínda formas de pastoreo ancestrais, como a “semi-trashumancia” no monte de utilidade pública Dehesa de Prada, dentro da Zona de Especial Conservación (ZEC) Macizo Central. No caso concreto do curro da Mosenda, aínda contan con pastores que seguen a gardar o gando durante a noite, acompañados dos seus mastíns, que protexen as reses dos ataques do lobo. “A súa experiencia e coñecemento da serra fan que sexan historia viva de Manzaneda”, destacan desde o Concello.

A intervención prevista contempla a substitución da cuberta de chapa verde por unha nova estrutura integrada na paisaxe, empregando materiais tradicionais como madeira e lousa. Tamén se construirá unha “pérgola aberta para facilitar o manexo do gando” e se renovarán as portas de acceso ao curro. A actuación pretende non só mellorar as condicións dos pastores, senón tamén poñer en valor o patrimonio cultural material e inmaterial asociado ao pastoreo estacional na serra.

A adecuación do curro da Mosenda únese a outro proxecto en marcha, a mellora ambiental do curro do Forxo, financiado pola Deputación de Ourense. Actualmente, este segundo proxecto atópase na fase de redacción e obtención de permisos, pero prevese que tamén se execute ao longo de 2025.

Desde o Concello sinalan a importancia de preservar estes espazos tradicionais, fundamentais para o equilibrio ecolóxico e a identidade cultural da zona. “O noso compromiso é garantir que o pastoreo transhumante, recoñecido como Patrimonio Cultural Inmaterial, poida seguir vivo durante moitos anos máis”, conclúen.