A música tradicional tomou a vila de Manzaneda no serán da Seitura

A vila de Manzaneda encheuse de cultura e memoria este sábado 26 de xullo cunha intensa programación que tivo como eixos a música tradicional e a homenaxe ás figuras locais.

Veciños e visitantes non quixeron perder esta celebración e déronse cita en Manzaneda neste VIII Serán da Seitura, celebrado na Praza da Igualdade, quw rendeu tributo un ano máis á veciña Ludivina Pérez Ricoy, e contou este ano cunha especial lembranza para Jacinta Fernández Alonso, recentemente falecida.

O acto, presentado por Montse Estévez, reuniu diversas agrupacións musicais e vocais, entre elas as Cantareiras de Trives (Blandina de Cotarós, Fiuca de Trives e Digna de Vilanova), o Grupo de Acordeóns Airiños da Porta Falsa, da localidade de Manzaneda, e a destacada actuación da violinista Candela Rodríguez, neta da homenaxeada Luzdivina Pérez. Todos os cantareiros dedicáronlle unha das cancións que máis lle gustaban a Jacinta Fernández, como homenaxe, ademáis de lembrarlle aos asistentes que os cantos de seitura era o que eles tiñan de novos, a mellor maneira de levar aqueles duros traballos.

A Real Banda de Gaitas Xuvenil puxo o broche de ouro á parte central da tarde, nun encontro no que a emoción e a tradición se deron a man. A programación continuou entrada a noite coa esperada Noite Celta, celebrada na estación de montaña, onde a música foi a gran protagonista.

Xa de madrugada, os sons das gaitas e das voces tradicionais inundaron a montaña grazas ás actuacións do Grupo Áurea, a Banda de Gaitas Agarimo de Catabois, o Conxunto de Xuíces do Certame e as Cantareiras da Real Xuvenil.

Unha velada de peche que combinou celebración, identidade e sentimento colectivo, deixando en Manzaneda a pegada de emoción e orgullo cultural.