Monterrei axuda na conciliación de cativos e familias

No marco do Plan Corresponsables do Ministerio de Igualdad, e baixo o lema “As mesmas ilusións sen exclusións”, o Concello de Monterrei organiza o Concilia de Verán para os “pequenos grandes artistas” durante xullo e agosto, coa finalidade de facilitar a conciliación das familias.

Esta iniciativa está destinada a rapaces de 4 a 12 anos, e as actividades estarán a cargo de ArqueodidactiX, do grupo Xeitura. O obxectivo principal é ofrecer aos cativos unha alternativa lúdica durante o seu período de vacacións.

Por unha banda haberá unha quenda especial en Albarellos de 10 prazas, do 23 ao 27 de xuño e do 1 ao 5 de setembro. En xullo e agosto haberá catro quendas, con 20 prazas nas piscinas de Albarellos e outras 20 no CEIP de Medeiros. Todas terán lugar de luns a venres, de 8,00 a 14,30 horas.

A cativada poderá desfrutar nas quendas de actividades lúdicas libres e dirixidas, animación á lectura, recursos de desenvolvemento persoal e aprendizaxe de hábitos saudables.

Inscricións

As inscricións xa se poden realizar a través dun formulario nas redes sociais do Concello, e están dispoñibles ata as 14,00 horas do 9 de xuño, ou ata esgotar as prazas de cada quenda.