Armariz bota de menos o seu hórreo do cemiterio

A aldea de Armariz está ateigada de hórreos, pero a veciñanza bota en falta o que se atopaba na entrada do cemiterio. Este hórreo, que é propiedade do Bispado, contaba con unha estrutura de madeira sobre dous pés de pedra. O ano pasado parte das tellas caeron sobre un vehículo, pois segundo indica o párroco, estaba en moi mal estado. Ante esta situación, decidiuse retirar a parte de madeira deteriorada para evitar posibles incidentes, e o párroco comenta que “non me podía arriscar a que lle caese a alguén”. Esta retirada parcial fíxose sen a aprobación de Patrimonio, onde hai un expediente aberto.

Os veciños atópanse insatisfeitos xa que non houbo un consenso para a súa retirada, nin unha inspección para comprobar o estado de deterioro nin se fixeron os requirimentos legais para o proceso. Continúan sen novas sobre o paradeiro e o futuro do hórreo e queren que volva ó seu sitio.