As Riscadeiras animarán a feira

As Riscadeiras preséntanse en sociedade esta próxima feira do 16 de maio no Carballiño para darse a coñecer desde a Praza Maior, ás 12,00 horas, e a partir da colaboración que se manterá no sucesivo entre o Concello e o Centro Sociocomunitario, a cuna deste grupo de cantareiras e pandereteiras, dirixido na actualidade por Lorena Crespo, unha xoven mestra que toca e canta desde que tiña 3 anos.

Son en total 21 cantareiras (entre elas un home), dentro do grupo de aprendizaxe avanzado, que xa fixeron algunhas actuacións en residencias de maiores, colexios e nalgunha celebración, e que por primeira vez sairán agora a rúa para ofrecer unha selección do seu amplo repertorio musical. Ademais, tamén funciona no centro outro grupo de oito mulleres que aínda están na fase de iniciación.

Ao preguntarlles sobre o que lles aporta formar parte das Riscadeiras, “moito” é o primeiro que se lles vén á cabeza, máis alegría, compañía, equilibrio mental e porque desta maneira contribúen a que “non se perdan as nosas raíces”.

Elas forman parte da gran familia do Centro Sociocomunitario, dirixido por Yolanda González e o seu equipo, que conseguiron abrilo a todas as idades cunha ampla oferta de actividades. Desta maneira, apuntaba a directora que a media de asistencia ronda as 250 persoas diarias. Non é de estrañar, porque alí a actividade é casi frenética, con clases de pilates (6 grupos), body balance (4), yoga (4), cachibol, zumba (3), baile latino (2), baile moderno (3), ademais de obradoiros de memoria, habilidades sociais e teatro, entre outros, aos que se engaden as actividades puntuais que se organizan cada mes relacionadas con música, sanidade ou coas manualidades, e cunha media de participación entre as 20 e as 25 persoas.

“Vos sodes as protagonistas”, sempre dispostas a actuar onde vos chaman, apuntaba Yolanda González, que agradecía tamén a presenza do concelleiro de Cultura, Diego Fernández, na presentación das Riscadeiras. O representante municipal ensalzaba a súa contribución “na defensa da cultura galega. Sodes persoas que dades exemplo a outras”, engadindo que a idade non é ningunha barreira e destacando as Letras Galegas que “este ano teñen un significado moi especial”.

O grupo achégame moita alegría e ademais axudamos a que non se perdan as nosas raíces — María Hermida

Vivo soa e aquí podo relacionome con moita xente, neste grupo estou moi contenta — Aurelia González