Carballiño invita a disfrutar do seu Entroido de Verán o vindeiro sábado

O vindeiro sábado 12 de xullo, O Carballiño énchese de cor, música e humor coa celebración do seu Entroido de Verán, que combina tradición, humor e moita participación popular.

O programa comezará ás 20,00 horas co gran Desfile de Comparsas, que percorrerá as rúas máis céntricas da vila -desde a Praza da Veracruz ata a rúa Rosalía de Castro-, enchendo as rúas de alegría e disfraces. Participarán as seguintes agrupacións: Asociación Cultural Os Arrieriños de Dacón; Asociación Cultural Os Azucarados de Maside; Asociación Cultural Os Nevadiños; Asociación Cultural Amigos de Partovia; Asociación Cultural Os Picapezas de Cea “La Roca”; Asociación Cultural Os da Caña (Marín); Parada de Amoeiro “Velero Pachá”; Asociación de Veciños Parroquia de Mandrás “Brasa” e Asociación de Veciños Parroquia de Mandrás “Madeiras Carrilás”.

Unha vez rematado o desfile, a celebración trasladarase á Praza Maior, onde a Disco Apocalipsis On Tour ofrecerá un dobre pase musical: de 21,30 a 22,30 horas e de 23,30 a 01,30 horas, cun espectáculo de música e animación que converterá o centro da vila nun encontro festivo.

Co obxectivo de garantir o correcto desenvolvemento do evento, as distintas áreas do Concello do Carballiño implicadas na organización xa mantiveron reunións de coordinación coa Policía Local, servizos de emerxencia e outros organismos, para activar un dispositivo de seguridade que permita gozar do Entroido de Verán con todas as garantías para participantes e asistentes.

O concelleiro de Turismo, Manuel Dacal, anima “a todo o mundo a achegarse e pasalo ben nun Entroido de Verán que facemos entre todos e para todos, co obxectivo de encher O Carballiño de ambiente, música e bo humor; traendo a esta tempada de verán unha tradición como a do Entroido, que tanto nos gusta”.

O Entroido de Verán 2025 promete ser unha gran cita aberta a todos, cun ambiente único e o espírito entroideiro por bandeira.