Castelao centra a actividade este ano na Insua dos Poetas do Carballiño

Castelao centra no que resta de ano a actividade cultural que se desenvolverá na Insua dos Poetas, na Esgueva de Madarnás (Carballiño). Un certame literario, a edición dun libro ou a colocación dun novo monumento, son algunhas das iniciativas que terán lugar ao redor da súa figura.

A Fundación Insua dos Poetas acordou, na recente xuntanza do seu Padroado, sumarse ás accións a desenvolver en toda Galicia e na nosa diáspora, polo 75 aniversario do falecemento de Alfonso Daniel R. Castelao neste 2025, declarado polo Parlamento e a Xunta de Galicia como Ano Castelao.

Esta iniciativa, a primeira que se presenta na provincia de Ourense para honrar a Castelao e difundir a súa obra e o seu exemplo, segundo apunta o presidente da fundación, Luis González Tosar, contará co apoio da Consellería de Cultura, Lingua e Xuventude e da Deputación de Ourense.

As actividades, que terán lugar no predio da Esgueva, comezarán o próximo 21 de marzo, entrada da primavera, coa Celebración da Poesía, a Árbore e a Auga, destinada ós centros de ensino da comarca do Carballiño, xunto co IES de Castro Caldelas, como convidado especial. Castelao, vida e obra, e a Poesía popular (sobre a que versará o Día das Letras Galegas) serán os temas a desenvolver nesa data, a partir das 11,00 horas. Na segunda parte do acto vaise proceder, como en anteriores edicións, á plantación de árbores autóctonas, por parte do alumnado, profesores e autoridades presentes.

Premios

O 25 de abril, Día do Libro, será o acto de entrega dos premios do Certame literario “Castelao na Insua”, dirixido a escolares de 3º e 4º da ESO, así como de 1º e 2º de Bacharelato dos centros de ensino da provincia de Ourense. Ese día, a figura e a obra de Castelao terán tamén un protagonismo principal.

Dito certame conta con dúas modalidades: poesía e narrativa. Trátase de incentivar a creatividade glosando nos seus traballos ó narrador, ensaísta, dramaturgo, debuxante, pintor, político e pai da patria galega. O prazo de presentación permanece aberto desde o pasado 24 de febreiro e rematará o 18 de abril. As bases pódense consultar nas redes sociais da Insua, ( Instagram @insuadospoetas ou escribindo ó correo secretaria@ainsuadospoetas.gal).

Na mesma liña, o sábado 19 de xullo terá lugar a XVI edición da Festa da Palabra na Insua dos Poetas, dedicada a Alfonso Daniel R. Castelao. Está previsto colocar un monumento representativo do homenaxeado, obra que correrá a cargo do artista ourensán Antón Pulido. “Con esta, serán dezaoito as pezas escultóricas instaladas na Insua, un espazo cultural de sete hectáreas no Carballiño, único en toda Galicia, no que a natureza dialoga coa literatura e as artes plásticas”, matiza Luis González Tosar.

Tamén figura, neste amplo e ambicioso programa arredor do escritor, artista e político, a coedición, coa Editorial Galaxia, do libro “Castelao escritor” de Eduardo Blanco-Amor, publicado en 1986, centenario do seu nacemento. A esta obra váiselle engadir o discurso, inédito “No enterro de Castelao”, “fermosa peza oratoria que Blanco-Amor pronunciou o 8 de xaneiro de 1950, para despedir os restos do ilustre exiliado no Panteón do Centro Galego de Bos Aires do cemiterio da Chacarita”, sinala o presidente da fundación.

Esta nova etapa de pulo e dinamismo da Insua dos Poetas no 2025 complétase con dúas importantes iniciativas; a creación de Centros de Ensino Colaboradores para establecer unha rede de colexios e institutos que anualmente propoñan actividades e participen nelas cos seus profesores e alumnado; e a apertura á integración da xuventude, a través do proxecto Mocidade da Insua, “interesantísimo proxecto para achegar a Insua ás mozas e mozos de toda Galicia e da emigración galega que ofrezan a súa creatividade”, conclúe.