A Insua imprime vocación literaria aos escolares

Cinco colexios da provincia con 230 alumnos acompañados polos seus profesores celebraron co resto do público asistente o Día do Libro na Insua dos Poetas, na Esgueva de Madarnás, no Carballiño. Neste evento tiveron tamén un protagonismo importante os 10 escolares gañadores do primeiro Certame escolar de poesía e narración, Castelao na Insua, que leron os seus traballos e recibiron de mans das autoridades presentes 100 euros e un diploma acreditativo.

Os gañadores son: “Puzzle Vital”, de Gabriela Fernández; “A carreira de Xoaniña”, de Gaia Janeiro; “Por que”, de Breogán Borrajo; “Europa”, de Sara Antía Fernández; “O segredo do vello”, de Fernanda Sofía Rodríguez; “Gallaecia”, de Nicole Alonso; “Xoán o ruso”, de Isaac Vázquez; “Durme neno durme”, de Nerea Paz; “Chousas”, de Leire de Castro, e “Xosé era un home de aldea”, de Saleta Pérez.

En total optaron 147 obras, entre as modalidades de narrativa e poesía, sendo maioritario o número de relatos, e “a maioría dos participantes mulleres. Son traballos de moita calidade, con moita vocación, serán os futuros escritores porque este certame ten como principal obxectivo despertar a vocación literaria e estamos moi satisfeitos porque foi todo un éxito”, sinala o presidente da Fundación Insua dos Poetas, Luís González Tosar. O certame terá continuidade en anos sucesivos ao redor doutros escritores, “nos que se inspiren os estudantes para construír os seus traballos”, matiza Tosar, quen engade que “estamos moi sorprendidos e contentos pola participación elevada e a calidade”.

“Castelao aínda ten moito que decirlle ás novas xeracións, a estes rapaces que poden recibir a mensaxe con proxección de futuro”, apuntaba González Tosar na semblanza sobre Castelao.

Tras a entrega dos premios, tres grupos realizaran unha visita guiada polos membros da fundación polas 20 obras artísticas, abordando a vida e obra dos escritores homenaxeados cada ano na Festa da Palabra. Como representantes institucionais asistiron José Castro e Lorena Castro, tenente alcalde e edil de Educación do Carballiño; César Fernández, vicepresidente da Deputación, e Jorge Rubén Sampedro, director provincial de Educación.