Os escolares celebrarán o Día do Libro na Insua dos Poetas

A Insua dos Poetas acollerá o próximo venres 9 de maio unha nova celebración do Día do Libro, que este ano terá a Alfonso R.Castelao como principal protagonista coincidindo co Ano Castelao.

Neste acto participará o alumnado e profesores do IES Otero Pedrayo (Ourense), IES Lagoa de Antela (Xinzo de Limia), IES Celso Emilio Ferreiro (Celanova), CPR Vila do Arenteiro (Carballiño) e CPI Virxe dos Remedios (Castro Caldelas).

O encontro literario está previsto para as 11,00 horas con entrada libre para todas as persoas interesadas en asistir. A Fundación Insua dos Poetas, que preside o escritor Luís González Tosar, tamén ten previsto para esa xornada un roteiro guiado pola insua para dar a coñecer as obras artísticas que alí se expoñen e tamén o espazo natural que ocupa sete hectáreas.

Escultura

Este ano, coincidiendo coa celebración o 19 de xullo da Festa da Palabra colocarase unha nova escultura, e xa serán vinte, neste caso do artista Antón Pulido e dedicada a Castelao.

Ademais, no transcurso do evento deste venres tamén se darán a coñecer os premios do Certame escolar de poesía e narración, Castelao na Insua, convocado pola Fundación Insua dos Poetas, que anima ao público a asistir a este acto.