Xoán Curiel, cantante y compositor: “Antes facía cancións tan complicadas que hoxe non sabería como tocalas”

O músico presentarase na igrexa da Veracruz, no Carballiño, o vindeiro sábado, 27 de decembro, co seu concerto “Treides comigo!”, onde interpretará cancións do seu último disco.

Pregunta.De cara ao concerto no Carballiño, como se está a preparar?

Respuesta.Cunha mestura de concentración, ilusión e traballo. Actuar nun espazo como a igrexa da Veracruz é unha responsabilidade. É un lugar impresionante arquitectonicamente e convida á escoita profunda. Nese contexto, penso que a interpretación vólvese máis contida e máis sincera, e a relación co público é unha experiencia compartida, case ritual. Por iso agradezo a Turismo de Galicia, que promove o concerto e apoia ao Concello do Carballiño, que nos abriu as portas amablemente.

P.Como definiría a súa música e a súa visión dela? Cambiou co paso dos anos?

R.Co tempo fun simplificando a miña forma de crear, buscando chegar á esencia e á alma das cancións desde unha perspectiva máis minimalista. Antes facía cancións tan complicadas que hoxe en día non sabería como tocalas, porque non me lembro do que facía coa guitarra. A experiencia acumulada durante 20 anos e o traballo con outros músicos deron persoalidade propia a cada un dos meus sete discos. O último, “Treides comigo!”, levoume a un son moi particular e mergulleime na lírica galego-portuguesa.

P.De onde xurdiu a idea de fusionar sons contemporáneos con cantigas medievais e como foi o proceso creativo?

R.A idea xurdiu dun concerto en Bóveda, onde colaborei co Concello para musicalizar varias cantigas de Pero de Veer. Posteriormente, compuxen sobre cantigas doutros trobadores ata crear o disco. Seleccionei dez cantigas, e nos útimos anos engadimos novo material, combinando o espírito medieval con sons contemporáneos para crear unha fusión persoal e actual.