Alberto Ramos, gañador do Premio Abrente 2024

O xurado do Premio Abrente de 2024, composto por Nerea Brey, actriz e dramaturga premiada en 2023; Rubén Porto, actor; Marcos Alonso, membro da Sala Ártika, e Roberto Pascual, director artístico da Mostra Internacional de Teatro de Ribadavia, deciden conceder por unanimidade o Premio Abrente desta 40ª edición ao texto titulado “Os servizos prestados”, que unha vez aberta a plica resulta ser de Alberto Ramos Ríos.

A obra destacou polo seu interese social, con posibilidade de xerar debate arredor da explotación e da autoexplotación laboral e o risco que conleva de perda de dereitos da clase

traballadora conquistados historicamente. Tamén transcende o texto ao ámbito afectivo, á perda de vínculos de amizade por motivos de relacións laborais.

Alberto Ramos é escritor e xornalista, estreouse como dramaturgo co Premio Rafael Dieste e traballa para a Asociación de Actores e Actrices de Galicia en Comunicación.

Por outra banda, o Premio do Público da MIT 2024 recaeu no espectáculo “Iribarne”.