Un espectáculo galego de danza inaugura a MIT de Ribadavia 2024

“Dique”, a nova produción de Nova Galega de Danza con dirección escénica de Marta Pazos, será o espectáculo inaugural da Mostra Internacional de Teatro de Ribadavia (MIT), que se celebrará entre os días 19 e 27 do próximo mes de xullo.

A peza abrirá pola noite a 40ª edición da MIT, no Auditorio Rubén García do castelo. Conta a épica historia das 200 mulleres que hai 150 anos escavaron o Dique da Campá de Ferrol, a obra de enxeñería hidráulica máis importante do século XIX, transportando 245.000 metros cúbicos de terra e pedras en 11.600.000 cestos sobre as súas cabezas. Trátase dun espectáculo coproducido por Nova Galega de Danza e a Xunta de Galicia, a través do Centro Coreográfico Galego, co patrocinio de Vegalsa e a MIT, e que conta cun equipo artístico e técnico composto integramente por mulleres, coa coreografía de Belén Martí Lluch e a música de Clara Aguilar.

Durante os seus nove días de celebración, a Mostra Internacional de Teatro de Ribadavia recibirá outras recoñecidas figuras da creación e dirección escénica, como Guillermo Calderón, Alice Ripoll, Alberto Conejero ou Esther Carrodeguas como parte dunha carteleira na que tamén figuran grandes nomes do clown, como o arxentino Gabriel Chamé e a inglesa Peta Lily, así como as estreas en Galicia dos novos traballos de Alberto Velasco ou Los Galindos.

Documentais, coloquios, cursos e presentacións complementan a intensa programación de espectáculos, para a que xa están á venda os bonos en ataquilla.com. Poderán adquirirse por esta vía ata o 24 de xuño, data a partir da que as entradas restantes estarán dispoñibles tanto na oficina da mostra como na súa web.

Participaron na presentación desta 40ª edición o director da Axencia Galega das Industrias Culturais, Jacobo Sutil; o alcalde de Ribadavia, César Fernández; o director artístico do festival, Roberto Pascual, e o director do Centro Dramático Galego, Fran Núñez, quen ofreceu máis detalles do espectáculo “Nada se sabe”, que se estreará o 26 de xullo na mostra de Ribadavia, coprodución con Culturactiva. Ignacio García e Fran Rei dirixen esta peza a modo de creación colectiva, para a que contan tamén coas achegas de Francisco Sánchez.

Outra compañía referente que estará na MOT é El Pont Flotant e por primeira vez estará un dos dramaturgos con maior proxección internacional de Chile: Guillermo Calderón con unha das súas obras máis exitosas, “Villa”, entre outros moitos espectáculos como os dirixidos ao público familiar ou os que se desenvolverán na rúa.

Será a edición “máis plural, inclusiva e festiva” da historia da MIT, segundo se puxo de manifesto.