Polémica polo aumento de turismos nun BIC de Leiro

Ante o peche da Ponte da Esperela en Leiro por causa das obras de acondicionamento e ante a masificación de vehículos pola Ponte de San Clodio por ise motivo, “co cal se viu alterado o benestar dos propios veciños, os socialistas pedimos un informe técnico ao arquitecto municipal”.

Asegura este grupo da oposición que hai máis dun mes que solicitou información sobre as repercusións do incremento do tráfico nesta ponte declarada Monumento Nacional en 1981 e Ben de Interés Cultural, e critica ao goberno municipal por non tomar medidas urxentes. En consecuencia, queren saber se se vai a ver afectada a Ponte de San Clodio no seu conxunto, no referido a súa estrutura debido á masificación de vehículos, polo peche da Ponte da Esperela.

O alcalde, Francisco José Fernández, dispón dun informe do arquitecto, quen considera que “o lixeiro incremento de tráfico rodado de turismos de pequena dimensión, que de modo temporal, está a sufrir a Ponte de San Clodio, non debería de afectar a súa integridade, nin a súa seguridade”.