A Veronza contará con un novo mobiliario feito en pedra

A Deputación de Ourense ven de licitar un contrato para a compra e colocación de sete mesas de granito cos seus respectivos bancos na área recreativa da Veronza, en Ribadavia. A actuación, coa que se substituirá por completo o actual equipamento de madeira, suporá un investimento de 14.060 euros por parte do goberno provincial e a execución das obras será dun mes.

O vicepresidente segundo da Deputación, Cesar Fernández, visitou a zona onde se acometerán estes traballos, acompañado polos técnicos da administración provincial Eva María Barrio e Manel Rodríguez. “A renovación completa do mobiliario desta zona garante a súa resistencia ás inclemencias meteorolóxicas, mellorando a imaxe e a conservación deste fermoso entorno á beira do río Avia”, sinalou César Fernández.

Esta actuación encáixase dentro do convenio de colaboración asinado en 2003 pola Deputación de Ourense e a Confederación Hidrográfica do Norte -hoxe Miño-Sil- para as obras de acondicionamento da marxe dereita do Avia, a través do cal apostábase pola recuperación deste entorno natural. Neste marco de cooperación entre a Deputación e o organismo de cuenca, a administración provincial adquiriu o compromiso da conservación, mantemento e limpeza. Un compromiso polo que se incorpora tamén mobiliario ou sinalización.