A Feira do Pemento de Oímbra, unha gran festa co mellor sabor

XXVIII EDICIÓN

A 28º edición encheu Oímbra e exaltou o produto máis senlleiro da vasta horta local, o seu pemento

Ana Villarino, Ángeles Vázquez e Rosendo Fernández botaron unha mao ás cociñeiras fritindo pementos. | La Región

É todo un clásico do verán na comarca de Monterrei, unha cita ineludible. O primeiro domingo de agosto, Oímbra vístese coas súas mellores galas para dar a benvida a unha grandísima cantidade de persoas atraídas polo seu pemento, unha exquisitez respaldada pola súa Indicación Xeográfica Protexida, e que por si soa ben paga a pena achegarse.

En total, este domingo servíronse máis de 1.500 quilogramos deste manxar, unha das principais referencias da rica horta local, e que pode presumir de ser un dos cinco pementos galegos de calidade diferenciada, toda unha garantía do seu sabor.

A Feira do Pemento de Oímbra, Festa de Interese Turístico Galego e sempre fiel aos seus costumes, cumpriu 28 anos cunha variada actividade concentrada na carballeira ao carón do Concello. Alí houbo postos de artesanía e produtos da zona, pulpeira e tamén se formaron as clásicas ringleiras de xente desexosa de probar pementos recén fritos de balde.

O bo ambiente fóra deu paso a multitudinario xantar con máis de 600 persoas, e que esgota sempre as súas entradas. Ninguén quixo perder un menú no que non faltaron os pementos, o pulpo nin a carne, ben maridados co viño da D.O. Monterrei de adegas locais.

Pemios ao enxeño veciñal

Ao remate do xantar tivo lugar a entrega de premios aos participantes na tradicional exposición de pratos co pemento como ingrediente principal, unha mostra moi visitada. Un total de 35 veciños de tódalas idades amosaron o seu enxeño cunhas creacións que o ano que vén formarán parte dun novo receitario colectivo, tal e como o entregado este domingo.

Tralos premios, a alcaldesa anfitrioa, Ana María Villarino, tomou a palabra e convidou a todos a “seguir desfrutando do día e dos pementos e regresar o ano que vén”, coa vista xa posta nunha nova edición que de seguro volverá ser todo un éxito para a vila.

Pero antes diso, durante a tarde seguiu a música e varias actividades de diversión para pequenos e maiores. Un concerto do recoñecido grupo tradicional A Roda puxo fin o domingo á tarde-noite a unha xornada redonda de gastronomía e festa.