Oímbra súmase ao pádel cunha nova pista con reserva online e acceso autónomo

Oímbra é o concello máis recente na comarca en unirse á “febre” do pádel, un dos deportes que máis ten medrado nos últimos anos.

A nova pista, ubicada onde estaba o campo de fútbol, detrás da báscula e moi preto do colexio, xa está dispoñible para a toda a veciñanza.

Para desfrutar da práctica do pádel, de forma totalmente gratuíta, é necesario rexistrarse primeiro e reservar a pista de forma sinxela a través da web do consistorio (oimbra.gal) cunha nova icona situado debaixo do acceso á sede electrónica.

Ademais de para reservar a instalación deportiva, para un máximo de catro persoas e en franxas de hora e media no seu horario de funcionamento (tódolos días entre as 9,00 e as 19,30 horas), o procedemento online permite asimesmo abrir de forma remota a porta que dá acceso á pista.

Tras rematar o turno, basta con pechala para que se bloquee o acceso automaticamente, e sen necesidade de acudir a ningún sitio para recoller ou deixar as chaves.

Financiamento

A nova pista de pádel de Oímbra contou cunha achega da Deputación por importe de 46.000 euros, coa que se finaciou integramente a súa construción, que se iniciou a finais de outubro.

A alcaldesa, Ana Villarino, asegura que “agora estamos traballando no proxecto para podela cubrir”.