Novo tempo político

O Partido Popular de Ourense oficializou sancionou onte o liderado de Luis Menor como presidente provincial da formación, rematando o periodo de interinidade que se produciu despois da renuncia do seu antecesor José Manuel Baltar, quen xa anteriormente deixara a presidencia da Deputación, pasando a mans do propio Menor despois das elecións municipais de 2023, así como a xestora encargada de dirixir o partido ata o congreso de onte.

Aínda que o terreo estaba abonado e sin atisbo reseñable de disidencia interna, o paso dado polos populares ourensáns non é menor (facendo abstracción da chanza que poida significar a coincidencia co apelido do xa presidente), posto que rompe cun xeito de gobernar durante 44 anos, dende que en 1979 tomara posesión Victorino Núñez, a quen sucedeu José Luis Baltara en 1990 e a este o seu fillo José Manuel entre 2012 e 2023.

Polo coñecido ata agora, Luis Menor parece disposto a imprimir o seu propio marchamo político. Se a memoria non me falla (que podería ser, posto que o paso do tempo debilita a consistencia dos recordos), é a primeira vez que na institución provincial o grupo gobernante chega a un acordo ca oposición para a distribución equilibrada de fondos e investimentos nos concellos. A iniciativa, saudada como un signo de aire fresco para política ourensá, non estuvo -nin está- exenta de algún resquemor interno entre nas formacións firmantes do pacto. Hai duas razóns que os alentan: a fractura da cultura da confrontación e o disenso permanente como forma de entender a política práctica, tan interiorizada durante décadas, e o fin do trato de favor a algunhos concellos populares amparado pola afinidade de siglas, afinidade co alcalde de turno ou polo peso político deste último, independentemente do que representase o seu concello no concerto socioeconómico provincial.

Abre, pois, o seu mandato oficial no PP nun ambiente de tranquilidade, si ben Luis Menor, que non é un aficionado, sabe como todos os políticos que ese estadio é unha concesión temporal suxeita á evolución dos acontecementos e retos aos que teña que facer fronte. Aí figura, sen dúbida, o concello de Ourense no nivel 1, pola sua entidade e consecuencias. A situación excede ó PP, pero está dentro do problema. Son moitas as voces convencidas de que a deriva actual conduce á perpetuación da catástrofe na terceira urbe de Galicia -privilexio amenazado polo retroceso constante- que acolle á terceira parte dos residentes na provincia.