Os alumnos galegos manteñen vivo o legado de Otero Pedrayo

A casa de Ramón Otero Pedrayo, en Trasalba, recibiu este luns a visita de estudantes galegos da ESO e Bacharelato, para a entrega dos premios anuais que levan o nome do Patriarca das Letras Galegas, que suman xa cinco edicións. Alí, foron galardoados polos seus traballos, nos que afondan na figura do intelectual.

Noa Rodríguez Muñoz e Sergio Lage, alumnos de 2º de Bacharelato do IES Ribeira do Louro do Porriño, levaron o primeiro premio. O seu proyecto “Os camiños da vida” foi elixido por unanimidade do xurado, destacando a calidade da imaxe, a coidada edición e a excelente documentación que empregaron os estudantes.

O segundo lugar foi para “Un “meniño naipelo” no espello de 14 lugares: Ramón Otero Pedrayo e os seus veráns en Vigo (1895-1901)”, feito por un grupo de estudantes do IES Castelao de Vigo. Valorouse nel o excelente traballo de documentación sobre o Vigo que Otero Pedrayo coñeceu sendo neno e a redacción do texto.

Ademais dos galardóns principais, o xurado acordou promover a publicación do traballo presentado baixo o lema “Alon”. Deste xeito, a obra de Juan Mosquera Magariños, alumno de 2º de Bacharelato do IES Xulián Magariños de Negreira, formará parte do vindeiro número da revista Trasalba, o anuario editado pola Fundación Otero Pedrayo.

No acto, participaron os membros da Fundación Otero Pedrayo e tamén representantes políticos. O secretario xeral da Lingua, Valentín García, puxo en valor a importancia deste certame na “contribución para ampliar o coñecemento entre as xeracións máis novas do Patriarca das Letras Galegas, que se fai especialmente máis significativa nun edición que coincide co celebración do Ano Oteriano”.

Importancia do legado

Precisamente, lembrou que o Goberno galego está traballando coas principais institucións culturais para consensuar o deseño dunha programación conxunta ao redor “dunha das grandes efemérides e citas deste ano en Galicia”. O obxectivo, segundo concretou, é acadar conxuntamente “a posta en valor e a maior difusión da relevancia da figura e valioso legado para o pensamento e identidade da Galicia contemporánea”.

Nesta liña, aplaudiu os traballos presentados nesta edición dos Premios Otero Pedrayo para “manter vixente entre a mocidade un dos piares do florecemento cultural e intelectual de Galicia e representante dunha xeración que soubo vincular o galeguismo coa defensa da cultura universal e co compromiso coa nosa terra”. Por iso, destacou a importancia de colaborar con este tipo de certames “que promoven o coñecemento das letras galegas e dos persoeiros máis destacados da nosa literatura”.