O OUFF homenaxea a Hans Zimmer na trixésima edición

Ourense/A trixésima edición do OUFF (Ourense Film Festival), que terá lugar entre o 26 de setembro e o 5 de outubro, desenvolverase entre numerosas novidades, títulos procedentes de diversas zonas do mundo e coa música como prato forte durante todo o certame. A falta de publicarse a programación definitiva da edición número trinta do OUFF, xa se coñecen algunhas das obras da Sección Oficial Internacional 2025. O festival seleccionou títulos procedentes de lugares como Irán, Arxentina, Taiwán ou Portugal.

“Un simple accidente”, de Jafar Pahani, un filme procedente de Irán e recente gañador da Palma de Ouro en Cannes 2025. Tamén se proxectará “Entroncamento”, de Pedro Cabeleira, unha película portuguesa que terá a súa estrea estatal no certame ourensán. Completan esta primeira selección as películas “Extranjera”, de Michelle Malley, unha coprodución entre Porto Rico e Taiwán que será tamén unha estrea do OUFF, neste caso europea, e “Gatillero”, de Cris Tapia, unha película de acción rodada integramente en plano secuencia, procedente da Arxentina.

A música tamén será protagonista nesta edición, na que ademais estreáse unha nova imaxe da Calpurnia. O domingo 28 de setembro, no marco da celebración do OUFF, a Xove Orquestra Ourensanía renderá tributo a Hans Zimmer, compositor de bandas sonoras tan recoñecibles como as de Gladiator, Piratas del Caribe ou Origen. Ademais, resultou gañador de dous Oscar, é considerado un revolucionario da banda sonora moderna por fusionar a orquestra sinfónica con electrónica e ritmos innovadores.

O público do festival poderá desfrutar en directo dalgunhas das bandas sonoras máis icónicas das últimas décadas. Ademais, os espectadores poderán desfrutar do OUFF Theme, o novo tema musical propio do festival, composto por José Manuel Cancela. Esta composición creouse para celebrar os 30 anos do certame e poderá escoitarse completo por primeira vez nesta cita.

De acordo co director musical da Xove Orquestra Ourensanía, José Luis Tielas, o concerto rende homenaxe a un dos grandes compositores da historia do cinema e “tamén proclama a vocación do OUFF de crecer, innovar, crear vínculos entre disciplinas artísticas, reforzando así o papel da cidade como punto de encontro internacional para a cultura”.

O OUFF Film Symphony: Hans Zimmer Tribute celebrarase o 28 de setembro no Auditorio Municipal de Ourense, a partir das 12,00 horas. O acceso será libre e gratuíto ata completar capacidade. A pasada edición, a Xove Orquestra Ourensanía inundou o Auditorio do ritmo da Marcha Imperial de Star Wars, na homenaxe ás obras que forman esta saga e ao compositor da súa banda sonora, John Williams.