O PP pide reabrir o Museo Municipal e desbotar a idea de facer unha cafetería

Inaugurado no ano 1987, conta colección composta por 1.306 obras dos mellores artistas ourensáns e dende entón foi un dos espazos culturais máis importantes da nosa cidade.

“Era un referente para os ourensáns, pero tamén para os milleiros de turistas que nos visitan. Era o mellor lugar para coñecer a historia artística da nosa cidade. O seu peche nunca se debeu dar porque con el privouse á cidadanía do acceso á cultura e perdeuse unha das ofertas turísticas fundamentais da c idade”, asegura o edil popular Pepe Araújo.

Neste mandato, o goberno local anunciou a intención de converter o Museo Municipal nun Museo do Viño e nas últimas reunións de xutnas de área engadiu a idea de crear unha cafetería, coa correspondente concesión de canon ao Concello, unha idea que os populares non comparten. “O proxecto non é acorde coa finalidade que debe ter un museo: preservar e promover a nosa identidade cultural. Ademais, sen a actualización e aprobación dun novo PXOM non pode habilitarse para tales fins comerciais”, explica o concelleiro. 

Por iso, o PP pedirá no salón plenario que o Museo volva ser un espazo referente de promoción da arte e a cultura ourensá para a veciñanza e os turistas. O grupo municipal tamén proporá que ademais da reapertura se realicen actividades complementarias e gratuítas como poden ser conferencias, presentacións e mostras culturais.