Presentan un documental do “Consello de Galiza” en Ourense

O Centro Cultural Marcos Valcárcel acolleu ese martes a presentación do documental “Consello de Galiza, goberno galego no exilio”, do director Xan Leira. No marco do 80 aniversario da fundación, esta obra repasa a historia do primeiro goberno galego no exilio, creado formalmente na cidade de Montevideo o 15 de novembro de 1944 e constituído, de facto, o 8 de decembro na cidade de Bos Aires.

A peza conta con testemuños de históricos galeguistas e republicanos coma Lois Tobío, Mariví Villaverde, Rosa Puente, entre outros. Participan tamén diversas personalidades da vida política e cultural galega e estatal como Miguel Anxo Seixas Seoane, presidente da Fundación Castelao; Francisco López “Chesqui”, Secretario xeral do Partido Galeguista; Iñaki Anasagasti, xornalista e dirixente do PNV; Xoán Antón Pérez Lema, avogado; Alfredo Erias, historiador. Por outra banda, recolle as intervencións de Miguel Ángel Santalices, Presidente do Parlamento de Galicia e Xesús Manuel Suárez, Presidente do Partido Galeguista, durante o acto celebrado no Parlamento de Galicia, en conmemoración do 80 aniversario do Consello de Galiza o 15 de novembro de 2024.

Para contextualizar o relato histórico, o documental salienta o recoñecemento de Alfonso Castelao como “primeiro presidente do Consello de Galiza e precursor do noso autogoberno”, celebrado no Parlamento de Galicia o 15 de novembro de 2024 coincidindo co 80 aniversario da constitución do Consello de Galiza. Neste senso, no acto levouse a cabo unha charla baixo o título de “Castelao, onte, hoxe e mañá”, na que interviron Miguel Anxo Seixas Seoane, Presidente da Fundación Castelao; Xesús Manuel Suárez, Presidente do Partido Galeguista e Luís González Tosar, escritor.