Recuperan a plataforma en defensa da sanidade pública

Organizacións veciñais, políticas, sindicatos, asociacións de doentes e outros usuarios independentes, uníronse onte no primeiro encontro que pretende reavivar a chama dunha plataforma aberta á cidadanía que se fundou en 2010 e que levaba xa uns anos nun parón temporal. Foron, segundo informan dende a plataforma, os recentes acontecementos protagonizados pola sanidade ourensá, así como a falta de previsión no Servizo Galego de Saúde, os motivos principais que espertaron, na última reunión mantida polos pacientes do Novoa Santos, o interese por volver traballar en conxunto nun espazo que serva como un buzón e recolla todo o que acontece no ámbito da saúde. Crear unha folla de ruta en defensa dunha sanidade pública, gratuíta e de calidade, como unha rexeneración que pretende comezar xa neste mes de abril a elaborar o seu decálogo como paso previo a unha presentación formal.