O Teatro Principal viaxa co FITO ao Vigo dos anos 70

O Teatro Principal acolleu onte unha nova obra, no marco do Festival Internacional de Teatro de Ourense -FITO-. Nesta ocasión a compañía Barrosanta estrou o seu segundo espectáculo, “Xoguetes rotos”, unha coprodución con ButacaZero. Na peza abordouse o tema da transexualidade no contexto histórico da Galicia dos anos 70. Mario, o protagonista, nacido na zona do Ribeiro, escapou pronto da vila para trasládarse ao Vigo nos anos 70, onde atopa cun incipiente movemento LGBTIQ+ no que se empeza a mover paseniñamente.

O texto orixinal, de Carolina Román, foi traducido e adaptado á nosa realidade por Roberto Pascual. Coa impecable dirección de Xavier Castiñeira, Anxo Outumuro e Dani Lago levaron a escena os seis complexos personaxes que protagonizaron a obra. A peza foi capaz de emocionar aos asistentes, que quedaron engaiolados cunha viaxe de descubrimento persoal.

Hoxe, sábado 25 de outubro, o Teatro Principal ofrecerá unha nova función. A compañía Producións Teatrais Excéntricas representará o espectáculo “Os dous de sempre, o retorno”, unha adaptación da historia de Castelao. Será a partir das 20,00 horas.

Para despedir o FITO, o domingo ás 19,00 horas, a compañía Gurigai -de Extremadura- presentará “Amalia y el río”. Baseada en feitos reais, esta é a historia de Antonia “La Lirina”, veciña de Olivenza. Sucede na fronteira estremeña con Portugal, entre Olivenza e Badajoz, durante os anos 1942 e 1964.