O asfaltado integral da rúa do Progreso obriga a modificar o tráfico no centro da cidade

As obras na rúa do Progreso encaran unha nova fase tras os traballos de asfaltado. A actuación, que arrancou onte, obrigou a cortar a circulación en Pardo de Cela, causando retencións e atascos nas entradas e saídas por esa zona da cidade.

O delegado da Xunta, Manuel Pardo, desprazouse ata o lugar xunto a técnicos da Axencia Galega de Infraestruturas para supervisar o inicio da intervención. Segundo explicou, as obras céntranse no fresado e na reposición puntual das zonas do firme máis deterioradas, para despois estender unha nova capa de rodadura en toda a vía. Ademais, a seguridade peonil reforzarase coa instalación de tres pasos de peóns elevados, executados con mestura bituminosa en quente.

O desenvolvemento destes traballos obriga a establecer itinerarios alternativos de tráfico para minimizar o impacto na cidadanía, cuns desvíos xa consensuados coa Policía Local de Ourense. Tras rematar os traballos entre Concepción Arenal e Ervedelo, hoxe iniciarase o asfaltado do seguinte treito, ata a rúa Parada Justel, deixando aberta ao tráfico a entrada por Pardo de Cela.

A intervención no Progreso forma parte dun proxecto da Consellería de Vivenda e Planificación de Infraestruturas para acondicionar 13 travesías urbanas de titularidade autonómica na cidade. Este plan conta cun investimento de 2,8 millóns de euros. Ata o momento, o Goberno galego xa executou melloras na accesibilidade e nas beirarrúas das rúas Emilia Pardo Bazán, Peña Trevinca, A Coruña, Progreso, Sáenz Díez e Río Arnoia. En paralelo ao asfaltado actual, tamén hai obras en marcha na rúa Bispo Lourenzo e na rúa do Seminario, onde xa se levantou o muro da marxe esquerda e os operarios traballan na substitución dos antigos colectores.