Manuel Pérez xa preside o PP de Paderne de Allariz

O alcalde de Paderne de Allariz dende xaneiro de 2023, Manuel Pérez Nóvoa (Paderne, 1959), vén de ser elixido presidente do Partido Popular da vila no congreso celebrado pola agrupación local, e comprometeuse a iniciar unha renovación do partido “cunha maior implicación da militancia”.

Pérez, quen estivo acompañado polo presidente provincial, Luis Menor; a vicepresidenta, Marta Novoa, e a secretaria xeral, Sandra Quintas, reivindicou un partido“unida, forte e presente na vida local”. Afirmou que “moitas cousas soluciónanse escoitando”, e chamou a traballar “polo ben común de Paderne”.

O novo presidente do partido local tivo palabras de recoñecemento para José Manuel Fernández, a quen substituíu na alcaldía meses antes das eleccións municipais de 2023, “a persoa que me fixo estar en política e chegar onde estou”.

Pola súa banda, Luis Menor, puxo ao PP de Paderne de Allariz como un exemplo de “relevo ordenado e de confianza”, primeiro na alcaldía e agora na agrupación local. Unha transición que é froito desa “canteira de persoas que dan un paso á fronte para participar na vida política local, con vocación de servizo”.