“Santa Cristina in Música” regresa a Parada de Sil

O Concello de Parada de Sil e Shelly Art Management presentarán nesta mañá de mércores, ás 11,00 horas, no Mosteiro de Santa Cristina, a terceira edición de “Santa Cristina in Música”, un proxecto musical que se desenvolve neste emblemático espazo do corazón da Ribeira Sacra. No acto intervirán Aquilino Domínguez Díaz, alcalde de Parada de Sil, e Conchi da Silva, coordinadora do evento. O festival conta coa colaboración do Consorcio de Turismo da Ribeira Sacra, a Deputación de Ourense, o Inorde, a Asociación Pórtico Musical e a Adega Ponte da Boga.

Santa Cristina in Música é un ciclo de concertos que busca crear un diálogo musical a través da combinación de estilos, instrumentos, voces e épocas, nunha proposta que abraza tanto a música sacra como a profana. Cun enfoque centrado no encontro entre intérpretes e público, o festival ofrece unha experiencia musical nun contorno natural e patrimonial como é a Ribeira Sacra.