Máis de 600 veciños déronse cita no Magosto de Porqueira

"Que viva Porqueira!" berraban os máis de 600 comensais que se achegaron onte ao campo da festa do concello limiao para celebrar o seu xa tradicional magosto, ao que asistiu o presidente da Deputación de Ourense, Luis Menor.

Preto das dúas do mediodía, o espazo xa estaba ateigado de veciños e visitantes que conversaban entre eles mentres se ía enchendo o espazo que serviría de comedor -que tivo que ser ampliado cunha carpa-, abrindo o apetito co olor do churrasco e os chourizos que se estaban a facer.

Logo das abundantes choivas das últimas xornadas, o onte foi un exemplo de tarde de outono na Limia: O ceo nubrado e unha temperatura agradable, que se non fose pola ameaza constante das pingadas puntuais, houbese permitido comer fóra.

Entre tódolos famélicos asistentes podíase ver á alcaldesa de Porqueira, Susana Vázquez, xunto ao presidente da Deputación, Luis Menor, conversando e rindo xunto aos veciños. “Agradezo moitísimo a invitación da alcaldesa para desfrutar ca veciñanza, hai unha gran afluencia de xente que demostra o arraigo que ten esta festa”, afirmou Menor, que afondou na importancia de escoitar á veciñanza e para iso “unha xornada de festa é unha ocasión magnífica”.

Pola súa banda, Susana Vázquez explicou que “estamos moi contentos, esta hoxe aquí máis do 70% da poboación. Somos un Concello moi pequeno pero a todo o mundo lle gusta colaborar nesta festa”. Unha das grandes novidades deste ano é a orquestra que amenizou a tarde: “O magosto deste ano mellor aínda que o do ano pasado, ata temos orquestra!”, dixo Manuel Portela, veciño de Porqueira. “A orquestra é duns rapaces de aquí e quixeron facer o fin de tempada coincidindo co noso magosto”, explicou a alcaldesa.

Durante a celebración recordouse con agarimo a José Rodríguez “Peitos” Dobaño, veciño e concelleiro de Porqueira que lle da nome ao edificio no que se celebra a xuntanza, cunha ofrenda floral da man da alcadesa e coa familia presente.

Os tradicionais gaiteiros que animaron o magosto estiveron acompañados por un veciño saxofonista, que amenizou os primeiros momentos da comida, mentres o churrasco e os chourizos chegaban aos pratos. Non faltaron tampouco as risas maridadas co viño e as anécdotas unha e mil veces repetidas das aventuras da veciñanza, que sen dúbida xa agarda con impaciencia o magosto do vindeiro ano. Que viva o magosto de Porqueira!