A conselleira de Medio Rural subliña a excelencia da pataca da Limia

A conselleira do Medio Rural, María José Gómez, visitou onte unha explotación de cultivo de pataca en Xinzo de Limia, onde puxo en valor a calidade da produción galega e salientou a importancia da comarca da Limia como zona de referencia neste cultivo.

Durante a visita, na que estivo acompañada polo director xeral de Gandaría, Agricultura e Industrias Agroalimentarias, José Balseiros, e polo delegado territorial da Xunta en Ourense, Manuel Pardo, Gómez destacou que os agricultores da zona se atopan na actualidade en plena campaña de recollida de pataca. Lembrou, ademais, a existencia da Indicación Xeográfica “Pataca de Galicia” como selo de excelencia na comarca.

A titular de Medio Rural aproveitou a ocasión, na véspera do Día Internacional da Muller Rural, para subliñar o papel do colectivo feminino no sector agrícola, personificado na titular da explotación visitada, que xestiona 17 hectáreas de cultivo e recibiu axudas correspondentes a plans de mellora e incorporación á actividade agraria.

Gómez reafirmou o apoio da Xunta ás mulleres rurais a través de iniciativas que teñen como obxectivo garantir a igualdade entre mulleres e homes no medio rural e no sector agrogandeiro, recoñecendo a contribución das mulleres ao desenvolvemento territorial. Gómez concluiu a visita comprometéndose a seguir traballando para que as mulleres teñan un maior papel, ao sinalar que “son un piar fundamental para o desenvolvemento do noso rural”.