Deputación de Ourense e Imserso únense para o termalismo sanitario

Luis Menor, na súa calidade de presidente da Deputación de Ourense, e da Sección de Vilas Termais a Federación Española de Municipios e Provincias, mantivo un encontro de traballo en Madrid con Maite Sancho, máxima responsable do Instituto de Maiores e Servizos Sociais (Imserso). Como resultado desta reunión, o Imserso incorporarase no Grupo de Traballo de Termalismo Sanitario, equipo multidisciplinar liderado pola Deputación de Ourense.

Menor trasladoulle á directora do Imserso que a Deputación está en disposición de poñer en marcha de forma experimental o primeiro programa focalizado nunha patoloxía concreta. A proposta presentarase ao longo deste mes coas técnicas termais que incluiría a súa duración e o sistema de avaliación de resultados do mesmo. En función destes elementos, a administración provincial aprobará un programa experimental piloto coa correspondente axuda pública e as datas da súa posta en marcha.

Maite Sancho interesouse polos programas pioneiros da Deputación de termalismo contra a soidade non desexada e contra o DCL, Deterioración Cognitiva Leve, á vez que felicitou á administración provincial pola iniciativa de termalismo posta en marcha o pasado mes de marzo dirixida a persoas maiores que sufriron a dana no municipio valenciano de Massanassa.

A entidade, adscrita ao Ministerio de Dereitos Sociais, Consumo e Axenda 2030, comprometeu tamén a súa presenza na Asemblea anual das Vilas Termais que este ano se celebrará en outubro na provincia de Salamanca, no concello de Vega de Tirados, e alí avaliar os pasos dados ata ese momento polo GTTS. As Vilas Termais comprometéronse a participar no Congreso Mundial de Cidades amigables coas persoas maiores xa que recentemente dábase a coñecer en Suíza que este evento en 2026 celebrarase en España.