A Deputación de Ourense impulsa o emprendemento termal

A Deputación de Ourense acolleu onte a presentación dun programa gratuíto de apoio ao emprendemento e consolidación empresarial impulsado a través de Inorde no marco do Plan de Sostibilidade Turística (PST) en Ourense Termal. 

Sinalou o presidente de Inorde, Rosendo Fernández, os obxectivos desta iniciativa, entre os que se atopan “apoiar proxectos que impulsen o sector termal e o dinamismo económico do seu entorno; desenvolver modelos de negocio no entorno rural; e fomentar a promoción do emprendemento preferentemente entre os máis novos e as mulleres”, xerando emprego de calidade nos 15 municipios do destino rural Ourense Termal. Emma González, xerente do Plan de Sostibilidade Turística en Ourense Termal, explicou que “a idea é captar 30 proxectos e a partir do 6 de marzo -data límite para presentar a solicitude- avaliar esas candidaturas e seleccionar eses 13 proxectos que vaian ser beneficiarios da mentorización”. 

Andrés Mazaira, coordinador da empresa adxudicataria que está a desenvolver o programa, fixo fincapé en que esta iniciativa “non está enfocada a teorizar” senón que “o obxectivo é que todo o que chegue a ese programa vai ser acompañado para acadar os seus resultados”. 

Oficina Termal AVE

Segundo as previsións, neste mes de febreiro comezará a funcionar a primeira oficina de información sobre termalismo instalada nunha estación de Alta Velocidade de España. Aínda que xa existen puntos de información turística xeral noutras estacións de tren, o de Ourense será o primeiro especializado nos balnearios da provincia e no programa de termalismo social provincial. Esta oficina será completamente dixital e abrirá 17 horas ao día.