“As vellas non deben de namorarse” chega a Rairiz de Veiga

A Arracada, Asociación de Mulleres Rurais do concello de Vilar de Santos, organiza o vindeiro 29 de novembro, ás 19,30 horas, no CEIP Carlos Cid Arregui, en Rairiz de Veiga, a representación da obra “As vellas non deben de namorarse”, unha adaptación contemporánea da coñecida comedia de Castelao, levada á escena pola compañía Airiños.

“Este evento marca un fito histórico tanto para a localidade, como para a compañía teatral, xa que nos seus máis de 90 anos de historia, este é o primeiro ano que actúan na provincia de Ourense”, explican dende a asociación, sendo a súa primeira parada Entrimo e agora con Rairiz de Veiga.

A adaptación da obra, asinada por Amantia Coello, directora da compañía desde 2018 e natural da Pereira, en Rairiz de Veiga, traslada a historia á realidade galega do século XXI, convertendo aos vellos en vellas e mostrando novas identidades de xénero e orientacións sexuais. Esta acción forma parte da aposta da Arracada por “achegar a cultura en galego ao rural, reforzando o compromiso coa igualdade, a visibilidade das mulleres e a defensa da nosa lingua e identidade”.

“Queremos traer a cultura ao rural e dar visibilidade a mulleres con conviccións, cheas de talento e que, co seu traballo, impulsan o cambio cara a unha sociedade máis xusta e igualitaria”, destaca Raquel Coello, presidenta da asociación.