Novo paso sobre o leito do Bidueiro en Rairiz de Veiga

O río Bidueiro que transcorre polo Concello de Rairiz de Veiga xa desfruta da súa nova ponte á altura de Ponte Catuxa, así o constatou o presidente da Confederación Hidrográfica Miño-Sil (CHMS), José Antonio Quiroga, quen estivo acompañado da alcaldesa de Rairiz de Veiga, Asunción Morgade, durante a visita ás obras de construción onte pola mañá.

As obras deron coa “demolición de la infraestructura antigua y en muy mal estado”, apuntou Quiroga, que ademais era pequena e estaba formada por catro tubos paralelos de formigón, cubrindo o leito do Bidueiro uns 12 metros ó ancho.

A nova ponte deseñouse cunha forma e tipoloxía novas, saíndo do leito sen apoios intermedios ó construír unha ponte de formigón de 12 metros de “luz libre” e 4 metros de ancho a base de vigas prefabricadas, lousa de formigón e aletas de cachotería, cumprindo cos parámetros en canto a “capacidad hidráulica suficiente que exige la normativa”.

O presidente explicou que a CHMS cofinanciou e executou estas actuacións cunha inversión final de 121.000 euros “en aras de la colaboración entre administraciones”.