Rebulir ofrece dez horas de baile en Ramirás na súa Verbena do Rella

Este festival, organizado pola asociación cultural Rebulir, consolídase como un dos grandes referentes da música de raíz e da cultura tradicional en Galicia. A cita congregará a preto de 200 artistas e ofrecerá máis de dez horas de programación musical e de lecer para tódolos públicos.

A xornada arrancará pola mañá cun obradoiro de toque con culleres no local da asociación. Xa pola tarde, a partir das 17,30 horas a programación intensificarase cos xogos tradicionais e os obradoiros infantís, seguidos polo pasarrúas e o posterior encontro de escolas de música e baile tradicional. A noite estará reservada para os grandes concertos de formacións de referencia como Carapaus, Coanhadeira, Airiños da Freba, O Fiadeiro ou Cantigas e Agarimos, estendendo a música ata a madrugada cunha gran foliada aberta.

A repercusión do evento vai máis alá do cultural, xa que supón un potente motor de dinamización turística e económica para toda a comarca, con todos os aloxamentos da zona completos desde hai días.

Como novidade de última hora, a organización adaptou os horarios e emprazamentos dalgunhas actividades debido á alerta vermella por altas temperaturas. Esta reorganización busca previr os efectos da calor e garantir o benestar tanto do público coma dos participantes, trasladando as citas principais cara ás franxas horarias máis frescas da tarde e da noite sen perder ningunha das propostas.